Me sloganin ‘për fëmijërinë e vjedhur’ mijëra qytetarë, aktivistë dhe figura publike protestuan në sheshin “Nënë Tereza”.  Protesta u organizua duke marrë shkas nga abuzimi seksual ndaj 15-vjeçares nga ish-roja i shkollës, Abaz Doga, i cili për një periudhë 2-vjeçare përdhunonte dhe shantazhonte të miturën. Mijëra protestues ngritën zërin për t’i thënë stop dhunës dhe abuzimit ndaj femrave në një marshim-protestë kundër kulturës së heshtjes ndaj viktimave të dhunës seksuale. Përfaqësuesja e Linjës së Këshillimit për Gra dhe Vajza, znj. Iris Luarasi, gjithashtu edhe një nga organizatoret e protestës, parashtroi kërkesat e organizatave të shoqërisë civile kundrejt Kuvendit të Shqipërisë, ku përfshihen edhe krijimi i një regjistri elektronik të dhunuesve seksualë dhe kastrimi kimik i pedofilëve. Fajin e ka dhunuesi e jo viktima. ☎️ 116117